Nazirlik iki qurumunda struktur dəyişiklikləri aparıb
Əmək və Əhalinin Sosial Müdafiəsi Nazirliyi sistemində struktur dəyişiklikləri aparılıb. Rəsmi məlumata görə, Dövlət Sosial Müdafiə Fondunun (DSMF) Səbail və Yasamal rayon şöbələrinin bazasında 1 saylı Bakı Ərazi Şöbəsi; Dövlət Məşğulluq Xidmətinin (DMX) Səbail və Yasamal mərkəzlərinin bazasında 1 saylı Bakı Ərazi Məşğulluq Mərkəzi yaradılıb.
Səbail və Yasamal rayonları üzrə sığortaedənlərin və sığortaolunanların məcburi dövlət sosial sığorta və fərdi uçot məqsədləri üçün uçotunu DSMF-nin Bakı Şəhər İdarəsi aparacaq. Bu rayonlar üzrə sosial xidmətlərin göstərilməsini, ünvanlı dövlət sosial yardımının alınması üçün müraciət etmiş ailənin maddi-məişət şəraitinin müayinəsinin aparılmasını 1 saylı Dayanıqlı və Operativ Sosial Təminat (DOST) Mərkəzi yerinə yetirəcək.
DSMF-nin 1 saylı Bakı Ərazi Şöbəsi DOST mərkəzlərindən daxil olan sənədlər əsasında sosial təminat növlərinin (pensiya, müavinət, prezidentin aylıq təqaüdü və s.) təyini və ödənişi, bu məsələlərlə bağlı həmin mərkəzlərdən daxil olan müraciətlərə operativ baxılması və həll edilməsi işlərini, sosial müdafiə və təminat sahəsində digər tədbirləri görəcək.
Səbail və Yasamal rayonları üzrə özünüməşğulluq proqramına cəlb edilmək üçün müraciət edən işsiz şəxslərin özünüməşğulluq fəaliyyəti üçün şəraitlərinin qiymətləndirilməsi işini və bu proqrama cəlb edilərək mal və materiallar formasında aktivlər verilmiş şəxslərin fəaliyyətlərinin monitorinqini 1 saylı DOST Mərkəzi aparacaq.
1 saylı Bakı Ərazi Məşğulluq Mərkəzi DOST mərkəzləri ilə əlaqəli fəaliyyət müstəvisində aktiv məşğulluq, habelə işaxtaran və işsiz şəxslərin sosial müdafiəsi ilə bağlı tədbirlərin təşkili, mərkəzlərdən daxil olan müraciətlərə operativ baxılması və həll edilməsi işlərini görəcək, həmçinin qeyri-leqal məşğulluğun aşkar edilməsi və qarşısının alınması sahəsində aidiyyəti orqanlarla fəaliyyət istiqamətlərinə uyğun birgə nəzarət tədbirlərinin həyata keçirilməsində iştirak edəcək.
