Qanun pensiyaçıları azaldır
İqtisadçı Qubad İbadoğlu Azərbaycanda pensiya çıxanların sayında kəskin azalma gözləndiyini bildirir.
2017-ci il iyulun 1-dək Azərbaycanda kişilər 63, qadınlar 60 yaşda pensiyaya çıxırdı. Həmin vaxtdan bəri yaş həddi artırılır. 2021-ci il iyulun 1-dək kişilərin, 2027-ci il iyulun 1-dək qadınların pensiya yaşı 65-ə çatacaq.
Novator.az-ın məlumatına görə, Qubad İbadoğlu özünün “Facebook” səhifəsində yazır ki, oktyabrın 1-dən minimum pensiya məbləği 200 manata çatdırılandan sonra pensiyaya çıxmaq üçün tələb olunan minimum pensiya kapitalı da artıb: “Qanunvericiliyə əsasən, güzəştli qruplar istisna olunmaqla pensiyaya çıxmaq üçün ya 25 il sığorta stajı, ya da 28800 manat minimum pensiya kapitalı tələb olunur. 25 il iş stajı olmayanlar və ya 28800 manat minimum pensiya kapitalı toplaya bilməyənlər pensiyaya çıxa bilməyəcəklər. Belələrinə hazırkı qanunla müavinət veriləcək.
Mövcud qanunvericilikdə minimum pensiya məbləği ilə pensiya çıxmaq üçün minimum pensiya kapitalı arasında düz mütənasib əlaqə yaradılıb. Bu o deməkdir ki, minimum pensiya məbləği artdıqca pensiya çıxmaq üçün tələb olunan minimum pensiya kapitalı da yüksələcək. Belə davam edərsə, yəqin ki, Azərbaycanda pensiya çıxanların sayında kəskin azalma müşahidə olunacaq”.
Azərbaycanda yaşa görə müavinət əmək pensiyası hüququ olmadıqda və işləmədikdə bu şəxslərə təyin edilir: 62 yaşına çatmış qadınlara; 67 yaşına çatmış kişilərə; 3 və daha çox uşaq doğub 8 yaşınadək tərbiyə etmiş, yaxud sağlamlıq imkanları məhdud övladını 8 yaşınadək tərbiyə etmiş 57 yaşına çatmış qadınlara; ana vəfat etdiyinə, yaxud analıq hüququndan məhrum edildiyinə görə 3 və daha çox uşağı və ya sağlamlıq imkanları məhdud övladını növbəti nikah bağlamadan təkbaşına 8 yaşınadək böyüdən 62 yaşına çatmış kişilərə.
Müavinətin məbləği 2019-cu ilin aprelin 1-dən 130 manatdır.
Əmək və Əhalinin Sosial Müdafiəsi Nazirliyinin son hesabatına görə, Azərbaycanda 1 milyon 350 min 680 nəfər pensiyaçı var.
