Dəyirmi masanın vaxtı və yeri açıqlandı
Noyabrın 5-nə siyasətçilərin və ictimai xadimlərin dəyirmi masası təyin olunub. Novator.az-ın məlumatına görə, tədbir saat 14-də Müsavat Partiyasının mərkəzi qərargahında başlayacaq.
Müsavat başqanı Arif Hacılı oktyabrın 23-də müxalifətin birliyi ideyasının, ölkədəki siyasi durumdan çıxış yollarının müzakirəsi üçün açıq dəyirmi masa keçirilməsini təklif edib. O, dəyirmi masaya Demokratik Qüvvələrin Milli Şurasının sədri Cəmil Həsənlini, AXCP sədri Əli Kərimlini, Respublikaçı Alternativ Partiyasının sədri İlqar Məmmədovu, Xalq Partiyasının sədri Pənah Hüseyni, Milli Strateji Düşüncə Mərkəzinin sədri, Müsavat Məclisinin üzvü İsa Qəmbəri, sabiq səhiyyə naziri Əli İnsanovu, jurnalist Mehman Əliyevi, politoloq Hikmət Hacızadəni dəvət edib və siyasi təşkilat rəhbərlərinin razılaşacağı digər siyasi xadimlərin iştirakını məqbul sayıb.
Arif Hacılı noyabrın 1-də bəyan edib ki, heç bir ilkin şərt irəli sürmədən, ölkədə mövcud durumu müzakirə etmək, çıxış yolları barədə fikir mübadiləsi aparmaq, mümkün olarsa bəzi razılaşmaların təsdiqlənməsi məqsədi ilə nəzərdə tutulan dəyirmi masa noyabr ayının 5-də baş tutacaq.
1988-ci ildə başlayan milli azadlıq hərəkatının öncül şəxslərindən olan Arif Hacılı 1991-1992-ci illərdə Azərbaycan Xalq Cəbhəsi Ali Məclisinə sədrlik edib.
1990-1995-ci illərdə parlamentin deputatı olub. Əbülfəz Elçibəyin prezidentliyi dövründə (1992-1993) ərazi hakimiyyət və idarəetmə orqanları ilə iş üzrə dövlət müşaviri postunu tutub.
1992-ci ildən Müsavatın katibi, 2001-ci ildən başqan müavini olub.
2003-2005 və 2011-2012-ci illərdə həbsdə yatıb.
2014-cü ildən Müsavatın başqanıdır.
