Bakının sosial-iqtisadi göstəriciləri
Bakı Şəhər Statistika İdarəsi yeni göstəricilər açıqlayıb. Novator.az bildirir ki, rəsmi hesabata görə, 2019-cu ilin yanvar-sentyabr aylarında paytaxt sənayesində istehsalın və xidmətlərin həcmi əvvəlki ilin doqquz ayı ilə müqayisədə 0,3 faiz artaraq 29,6 milyard manat olub. Sənayedə qeyri-dövlət sektorunun payı 83,7 faiz göstərilir.
Doqquz ayda şəhərin iqtisadi və sosial sahələrinin inkişafı üçün əsas kapitala 6 milyard 291,6 milyon manat və ya əvvəlki ilin yanvar-sentyabr ayları ilə müqayisədə 9,1 faiz az vəsait yönəldildiyi vurğulanır.
Rəsmi statistikaya əsasən, yanvar-sentyabr aylarında ticarət dövriyyəsinin həcmi 2018-ci ilin doqquz ayı ilə müqayisədə 3,4 faiz, ictimai iaşə dövriyyəsi real ifadədə 6,9 faiz, əhaliyə göstərilən ödənişli xidmətlərin dəyəri real ifadədə 2,4 faiz artıb.
Doqquz ayda istehlak məhsullarının və xidmətlərin qiymətlərində 2,9 faiz yüksəlmə rəsmiləşib.
Sentyabrın 1-nə Bakıda orta aylıq nominal əməkhaqqı 822,2 manata çatıb.
Muzdlu işçilərin sayı həmin dövrə 773 min 647 nəfər göstərilib.
