Qızıldan irəli…
İqtisadi İslahatların Təhlili və Kommunikasiya Mərkəzi yeni ixrac icmalı açıqlayıb. Novator.az bildirir ki, rəsmi hesabata görə, 2019-cu ilin yanvar-sentyabr aylarında 1 milyard 413 milyon ABŞ dolları dəyərində qeyri-neft ixracı qeydə alınıb. 9 ayda 2018-ci ilin yanvar-sentyabr ayları ilə müqayisədə qeyri-neft ixracı 206 milyon dollar və ya 17 faiz artıb.
Qeyri-neft sektoruna aid malların siyahısında pomidor 142,3 milyon dollarla liderdir. Qızıl (sikkə kəsilməsində istifadə olunmayan, digər emal olunmamış formalarda – 120,8 milyon ABŞ dolları) ikinci və qabığı təmizlənmiş meşə fındığı (87,9 milyon ABŞ dolları) üçüncü yerdə qərarlaşıb.
9 ayın meyvə-tərəvəz ixracı 389,8 milyon dollar, plastmas və onlardan hazırlanan məmulatların ixracı 152 milyon dollar, alüminium və ondan hazırlanan məmulatların ixracı 97,2 milyon dollar, pambıq lifi ixracı 86,7 milyon dollar, kimya sənayesi məhsullarının ixracı 76,6 milyon dollar, elektrik enerjisi ixracı 62,9 milyon dollar, qara metallar və onlardan hazırlanan məmulatların ixracı 46,7 milyon dollar, şəkər ixracı 23,2 milyon dollar, pambıq ipliyi ixracı 22,5 milyon dollar, alkoqollu və alkoqolsuz içkilərin ixracı 20,3 milyon dollar göstərilir.
