Oqtay Gülalıyevin vəziyyəti necədir?
Paytaxtdakı “Baku City Hospital” xəstəxanasına yerləşdirilən hüquq müdafiəçisi Oqtay Gülalıyevin vəziyyəti ağırdır.
Oktyabrın 29-u axşam saatlarında Oqtay Gülalıyevi Bakıda minik avtomobili vurub. Hadisə hüquq müdafiəçisi yolu keçərkən, piyada xəttinin üstündə baş verib. Avtomobilin sürücüsü Oqtay Gülalıyevi Kliniki Tibbi Mərkəzə aparıb. Sonra o, “Baku City Hospital”a yerləşdirilib. Başından xəsarət alan Oqtay Gülalıyevin beyninə qan sızdığı, vəziyyətinin ağır olduğu, süni nəfəs aparatına qoşulduğu bildirilir.
Oqtay Gülalıyev Repressiya və İşgəncələr Əleyhinə Komitənin koordinatorudur. Oktyabrın 29-da Repressiya və İşgəncələr Əleyhinə Komitə “İşgəncələrə son qoyulsun!” adlı 10 günlük ictimai kampaniyaya start verdiyini açıqlamışdı.
Oqtay Gülaliyev indiki Dövlət İdarəçilik Akademiyasının məzunudur. Müxalif görüşləri ilə tanınır. Demokratik Qüvvələrin Milli Şurasının üzvüdür.
Oqtay Gülalıyev “Kür” Vətəndaş Cəmiyyəti Qərargahının koordinatoru olan zaman, 2012-ci ilin aprel ayında Sabirabadda, çay daşqınından ziyan çəkmiş vətəndaşlarla görüş zamanı tutulub. Sabirabad Rayon Məhkəməsi Cinayət Məcəlləsinin 220.2-ci maddəsi ilə (hakimiyyət nümayəndəsinin tələblərinə fəal şəkildə müqavimət göstərmə və kütləvi iğtişaşlara, vətəndaşlara qarşı zorakılığa çağırış) ittiham olunan Oqtay Gülalıyev barəsində 2 aylıq həbs qətimkan tədbiri seçib, iyun ayında həbs qətimkan tədbiri ləğv edilib.
2016-cı ilin oktyabrında cinayət işinə xitam verilib, onun ölkədən çıxışına qoyulan qadağa aradan qaldırılıb.
