Bakı müzakirələri
Oktyabrın 30-u Bakıda Müstəqil Dövlətlər Birliyi Müdafiə Nazirləri Şurasının iclası keçirilib. İclasa Azərbaycan, Rusiya, Belarus, Qazaxıstan, Özbəkistan, Tacikistanın müdafiə nazirləri, Qırğızıstan Silahlı Qüvvələri Baş Qərargahının rəisi və MDB İcraiyyə Komitəsinin sədri-icraçı katib Sergey Lebedev qatılıblar.
Mod.gov.az-ın məlumatına görə, iclasda MDB ölkələrinin 2025-ci ilədək hərbi əməkdaşlıq konsepsiyaları və MDB üzvü olan dövlətlərin Müdafiə nazirliklərinin 2025-ci ilədək radiasiya, kimyəvi və bioloji vəziyyətlə əlaqədar birgə monitorinq və qiymətləndirmə sisteminin hazırlanmasına dair əsas istiqamətlər nəzərdən keçirilib, “Beynəlxalq Ordu Oyunları-2019”un yekunları, zabit kadrlarının hazırlanması, “Elmə başlanğıc” innovativ elmi ideyalar beynəlxalq festivalının keçirilməsi və İkinci Dünya müharibəsində qələbənin 75 illiyinin qeyd edilməsinə hazırlıq məsələləri, birlik ölkələrinin 2019-cu ildə hərbi əməkdaşlığının nəticələri müzakirə edilib, MDB Müdafiə Nazirləri Şurasının 2020-ci il üçün iş planı təsdiqlənib.
Novator.az bildirir ki, MDB-nin əsası Rusiya, Belarus və Ukrayna dövlət başçılarının 8 dekabr 1991-ci ildə imzaladığı sazişlə qoyulub.
21 dekabr 1991-ci ildə keçmiş SSRİ-nin daha 8 respublikası – Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan sazişi imzalayaraq MDB-yə qoşulublar.
Azərbaycanın MDB-yə qoşulması 20 sentyabr 1993-cü ildə rəsmiləşib. 1993-cü il dekabrın 9-da Gürcüstan da MDB-yə daxil olub.
Sonralar Rusiyanın hərbi təcavüzünə məruz qalan Gürcüstan və Ukrayna MDB-dən ayrılıblar.
MDB-nin icra orqanı Minskdə yerləşir.
