Azərbaycandan ABŞ-a rəsmi etiraz
Prezident Administrasiyasının xarici siyasət məsələləri şöbəsinin müdiri Hikmət Hacıyev ABŞ Konqresinin Nümayəndələr Palatasının oktyabrın 29-da qəbul etdiyi qətnaməyə münasibət bildirib.
Qondarma erməni soyqırımını tanıyan və pisləyən həmin qətnaməni 435 nəfərlik Nümayəndələr Palatasının 405 üzvü dəstəkləyib.
Saxta soyqırımı iddialarına görə, 1915-ci il aprelin 24-dən başlayaraq 1923-cü ilə kimi Türkiyədə 1 milyon 500 min nəfər erməni öldürülüb. Bu iddiaları indiyədək bir çox ölkə (Fransa, İtaliya, İsveç, İsveçrə, Avstriya, Niderland, Belçika, Lüksemburq, Yunanıstan, Kipr, Danimarka, Polşa, Çexiya, Slovakiya, Vatikan, Litva, Rusiya, Kanada, Uruqvay, Braziliya, Argentina, Çili, Venesuela, Boliviya, Livan və s.), bəzi beynəlxalq qurumlar, həmçinin ABŞ-ın 49 ştatı rəsmən tanıyıb.
Oktyabrın 30-da AZƏRTAC-a danışan Prezident Administrasiyasının xarici siyasət məsələləri şöbəsinin müdiri Hikmət Hacıyev deyib ki, Azərbaycan Nümayəndələr Palatasının qondarma erməni soyqırımı haqqında qəbul etdiyi qətnaməni pisləyir, onu qərəzli və ədalətsiz sayır: “Bu qətnamənin heç bir siyasi, hüquqi və tarixi əsası yoxdur, ermənipərəst lobbi qruplarının səyləri nəticəsində qəbul edilib.
Həmin dövrdə baş vermiş hadisələri siyasətçilər deyil, tarixçilər araşdırmalıdır. Ermənistan və erməni lobbi dairələri qondarma erməni soyqırımını siyasi möhtəkirlik obyektinə çeviriblər. Onlar bu məqsədlə ermənilərin Cənubi Qafqazda və digər regionlarda törətdikləri cinayətləri ört-basdır etməyə çalışırlar. Ona görə də Ermənistan həmin dövrün hadisələrini birgə tarixi komissiyanın araşdırması barədə Türkiyənin təklifini qəbul etmir. Tarixin saxtalaşdırılması, “tarixin yenidən yazılması” cəhdləri və onun siyasi təzyiq məqsədilə istifadə edilməsi qəbuledilməzdir”.
