Fədayə Laçın azadlığa çıxdı
Müğənni Fədayə Laçın (Məmmədova) oktyabrın 29-u səhər Bakı İstintaq Təcridxanasından azadlığa buraxılıb.
Novator.az bildirir ki, 2017-ci il oktyabrın 23-də Astaradan Bakıya etap olunan məhbuslar Etibar Məmmədov və Əli Ağami Biləcəri qəsəbəsi ərazisində xüsusi təyinatlı vaqondan qaçıb. Əli Ağami oktyabrın 26-sı Şirvan şəhərində həbs olunub, Etibar Məmmədov isə noyabrın 2-si Bakının Qaradağ rayonunda keçirilmiş xüsusi əməliyyatda öldürülüb.
Məhkumların qaçmasına yardım etməkdə təqsirləndirilən bəzi şəxslər, o cümlədən Etibar Məmmədovun dostu Fədayə Laçın tutulub.
2018-ci il dekabrın 26-sı Bakı Ağır Cinayətlər Məhkəməsi başqa iş üzrə də təqsirli bilinən Əli Ağamini 20 il müddətinə azadlıqdan məhrum edib.
Fədayə Laçın 5 il, digər şəxslər 6-9 il arası həbs cəzası alıb.
2019-cu il sentyabrın 30-da Bakı Apellyasiya Məhkəməsi bir neçə nəfərin cəzasını yüngülləşdirib. Fədayə Laçının cəzası 2 ilə endirilib. Həmin cəza müddəti oktyabrın 29-da başa çatıb.
Fədayə Məmmədova 1977-ci ildə Laçın şəhərində anadan olub.
