Qəbələdə açılışlar
Prezident İlham Əliyev oktyabrın 28-də Qəbələ rayonuna səfər edib.
AZƏRTAC xəbər verir ki, dövlət başçısı Vəndam qəsəbəsində dekorativ gülçülük istixanası ilə tanış olub. Arayışa görə, “AzRose” MMC xüsusi qızılgül növlərinin yetişdirilməsi üçün istixanaların quraşdırılması işlərinə 2017-ci ildən başlayıb. Burada “Red Naomi”, “Avalanj”, “Talea”, “Aqua”, “Sweet Avalanj”, “Jumilia”, “Wow” və “London eye” kimi xüsusi qızılgül növləri yetişdirilir, onların yerli və xarici bazarlara satışa çıxarılması hədəflənir.
Həmin gün rayonda 110/35/10 kilovoltluq “Qəbələ” elektrik yarımstansiyası yenidənqurmadan sonra istismara verilib. Prezident yarımstansiyanı, eyni zamanda 110/35/10 kilovoltluq “Ağdaş” elektrik yarımstansiyasını işə salıb.
İlham Əliyev Qəbələ şəhərinin içməli su təchizatı və kanalizasiya sistemlərinin istifadəyə verilməsi, “Azərxalça” Açıq Səhmdar Cəmiyyətinin Qəbələ filialının açılış mərasimlərinə də qatılıb.
Qəbələdə həmçinin Böyük Əmili-Bılıx-Əmirvan avtomobil yolu yenidənqurmadan sonra istifadəyə verilib.
