Qoşulmayanların zirvəsi
Oktyabrın 25-i Bakıda Qoşulmama Hərəkatına üzv ölkələrin dövlət və hökumət başçılarının zirvə görüşü başlayıb.
AZƏRTAC xəbər verir ki, zirvə görüşündə iştirak edən dövlət və hökumət başçılarını Azərbaycan prezidenti İlham Əliyev qarşılayıb.
Zirvə görüşünü Qoşulmama Hərəkatının hazırkı sədri olan Venesuela prezidenti Nikolas Maduro açıb. Sonra Qoşulmama Hərəkatına sədrlik Azərbaycana təhvil verilib, İlham Əliyev zirvə görüşündə nitq söyləyib.
4 yekun sənədin qəbulu gözlənən zirvə görüşünə 160-a yaxın ölkə və beynəlxalq təşkilatın nümayəndələri, 60-a yaxın ölkənin dövlət və hökumət başçıları qatılıb.
120 üzvü olan Qoşulmama Hərəkatı həmçinin 17 müşahidəçi dövləti və 10 müşahidəçi beynəlxalq təşkilatı birləşdirir. 1961-ci ildə yaradılmış təşkilata Azərbaycan 2011-ci il mayın 26-da qəbul olunub, 2019-2022-ci illər üçün sədrlik hüququ əldə edib.
