Büdcə necə icra olunub?
Maliyyə Nazirliyi 2019-cu ilin dövlət büdcəsinin doqquz ayda necə icra olunduğunu açıqlayıb. Novator.az bildirir ki, rəsmi hesabata görə, yanvar-sentyabr aylarında dövlət büdcəsinin mədaxili 16 milyard 871,2 milyon manat, xərcləri 16 milyard 690,6 milyon manat olub, 180,6 milyon manat məbləğində büdcə artıqlığı yaranıb.
Vergilər Nazirliyinin xətti ilə dövlət büdcəsinə 5 milyard 608,5 milyon manat təmin edilib.
Doqquz ayda Dövlət Gömrük Komitəsinin xətti ilə büdcəyə 3 milyard 250,1 milyon manat gəlib.
Dövlət büdcəsindən maliyyələşən təşkilatların ödənişli xidmətlərindən daxilolmalar 377,2 milyon manat, digər daxilolmalar 99,4 milyon manat göstərilir.
Neft Fondundan dövlət büdcəsinə 7 milyard 536 milyon manat köçürülüb.
Hesabata əsasən, doqquz ayda dövlət büdcəsi xərclərinin 35,3 faizi sosial xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib.
2019-cu ilin dövlət büdcəsinin gəlirləri 23 milyard 168 milyon manat, xərcləri 25 milyard 190 milyon manat məbləğində təsdiqlənib.
