Razılaşma
Türkiyə və Rusiya hərbçiləri Suriyanın şimalında birgə patrul xidməti aparacaq. Novator.az-ın məlumatına görə, prezidentlər Rəcəb Teyyub Ərdoğan və Vladimir Putinin oktyabrın 22-si Rusiyanın Soçi şəhərində keçirilmiş görüşündə əldə olunub.
Suriyada 2011-ci ildə prezident Bəşər Əsədin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. Ölkənin Türkiyə ilə sərhəd bölgələrinə nəzarət kürd yaraqlılarının nəzarətinə keçib. Onlar Türkiyədəki kürd separatçılarına dəstək verirlər.
Türkiyə Silahlı Qüvvələri oktyabrın 9-da sərhəd boyu məskən salan kürd qruplaşmalarını bölgədən sıxışdırıb çıxarmaq üçün Suriyada hərbi əməliyyata başlayıb, xeyli ərazini terrorçulardan təmizləyib.
Oktyabrın 17-si Ankarada Türkiyə prezidenti ilə bir araya gələn ABŞ vitse-prezidenti Mayk Pens Rəcəb Teyyub Ərdoğanı əməliyyatları 5 günlük dayandırmağa razı salıb. Bunun əvəzində ABŞ kürdlərin sərhəd zolağından Türkiyənin tələb etdiyi məsafəyə çəkilməsinə, ağır silahların onlardan alınmasına boyun olub.
Rəcəb Teyyub Ərdoğanın Vladimir Putinlə Soçidə əldə etdiyi razılaşmaya əsasən, kürd birləşmələri oktyabrın 23-ü günortadan başlayaraq 150 saat ərzində Türkiyə sərhədindən 30 kilometr geri çəkilməlidir. Bu məsələnin həlli ilə Suriya ordusu və Rusiya hərbi polisi məşğul olacaq. Bundan sonra Türkiyə və Rusiya hərbçiləri ərazidə birgə patrul xidmətinə başlayacaq. Birgə patrul xidməti Türkiyə sərhədindən Suriya ərazisinin 10 kilometr dərinliyinədək olan hissəsini əhatə edəcək.
