Ramiz Mehdiyev Milli Elmlər Akademiyasının prezidenti oldu
Akademik Ramiz Mehdiyev Azərbaycan Milli Elmlər Akademiyasının (AMEA) prezidenti seçilib.
Novator.az-ın məlumatına görə, qərar AMEA-nın oktyabrın 23-də keçirilən ümumi yığıncağında qəbul olunub.
AMEA-nın əvvəlki prezidenti Akif Əlizadə həmin gün istefaya gedib.
Akif Əlizadə 2013-cü ildən AMEA-nın prezidenti idi.
AMEA-nın prezidenti ümumi yığıncaqda seçilir. Bu seçimi ölkə prezidenti təsdiqləyir.
Oktyabrın 23-də prezident İlham Əliyev Ramiz Mehdiyevin AMEA-nın prezidenti vəzifəsinə təsdiq edilməsi barədə sərəncam imzalayıb.
Ramiz Mehdiyev 1938-ci ildə Bakı şəhərində doğulub. Azərbaycan Dövlət Universitetinin tarix fakültəsini və Moskva Dövlət Universitetinin fəlsəfə fakültəsinin aspiranturasını bitirib.
Azərbaycan Dövlət Universitetinin müəllimi olub, fəlsəfə elmləri doktoru, 2007-ci ildən Azərbaycan Milli Elmlər Akademiyasının həqiqi üzvüdür.
1957-1962-ci illərdə “Xəzərdənizneft” İdarəsində çalışıb.
1965-ci ildən Azərbaycanın mərkəzi komsomol təşkilatında təlimatçı, 1967-ci ildən Naxçıvan Muxtar Respublikasının komsomol təşkilatında ikinci katib olub.
1974-1978-ci illərdə Azərbaycan Kommunist Partiyası Mərkəzi Komitəsində məsul vəzifələrdə işləyib.
1978-1980-ci illərdə 26 Bakı Komissarı Rayon Partiya Komitəsinin birinci katibi olub.
1980-ci ildən Azərbaycan KP MK-nın şöbə müdiri, 1983-cü ildən KP MK-nın katibi postlarında çalışıb.
1988-1994-cü illərdə Azərbaycan Elmlər Akademiyasının İctimai-Siyasi Tədqiqatlar və İnformasiya İnstitutunun şöbə müdiri olub.
1994-cü ildən Prezidentin İcra Aparatının ümumi şöbəsinə müdirlik edib, 1995-ci ildən 2019-cu il oktyabrın 23-dək Prezident Administrasiyasının rəhbəri olub.
“Heydər Əliyev”, “İstiqlal”, “Şöhrət” və “Şərəf” ordenləri ilə təltif olunub. Həqiqi dövlət müşaviri, Təhlükəsizlik Şurasının üzvüdür.
Ramiz Mehdiyev AMEA-nın 11-ci prezidentidir. Yarandığı 1945-ci ildən bəri akademiyanın prezidenti postunu bu şəxslər də tutub: Mir Əsədulla Mirqasımov, Musa Əliyev, Yusif Məmmədəliyev, Zahid Xəlilov, Rüstəm İsmayılov, Həsən Abdullayev, Eldar Salayev, Fəraməz Maqsudov, Mahmud Kərimov, Akif Əlizadə.
