Ramiz Mehdiyev istefaya getdi
Oktyabrın 23-də prezident İlham Əliyev Ramiz Mehdiyevi Prezident Administrasiyasının rəhbəri vəzifəsindən azad edib.
Həmin gün dövlət başçısı Ramiz Mehdiyevi “Heydər Əliyev ordeni” ilə təltif edib. Ramiz Mehdiyev bu ordenə dövlət idarəçiliyi və elmin inkişafı sahəsində səmərəli və uzunmüddətli xüsusi xidmətlərinə görə layiq görülüb.
Başqa bir sərəncamla Ramiz Mehdiyev Təhlükəsizlik Şurasının tərkibinə daxil edilib. Təhlükəsizlik Şurasının katibi postunu general-polkovnik Ramil Usubov tutur.
Ramiz Mehdiyev 1938-ci ildə Bakı şəhərində doğulub. Azərbaycan Dövlət Universitetinin tarix fakültəsini və Moskva Dövlət Universitetinin fəlsəfə fakültəsinin aspiranturasını bitirib.
Azərbaycan Dövlət Universitetinin müəllimi olub, fəlsəfə elmləri doktoru, akademikdir.
1957-1962-ci illərdə “Xəzərdənizneft” İdarəsində çalışıb.
1965-ci ildən Azərbaycanın mərkəzi komsomol təşkilatında təlimatçı, 1967-ci ildən Naxçıvan Muxtar Respublikasının komsomol təşkilatında ikinci katib olub.
1974-1978-ci illərdə Azərbaycan Kommunist Partiyası Mərkəzi Komitəsində məsul vəzifələrdə işləyib.
1978-1980-ci illərdə 26 Bakı Komissarı Rayon Partiya Komitəsinin birinci katibi olub.
1980-ci ildən Azərbaycan KP MK-nın şöbə müdiri, 1983-cü ildən KP MK-nın katibi postlarında çalışıb.
1988-1994-cü illərdə Azərbaycan Elmlər Akademiyasının İctimai-Siyasi Tədqiqatlar və İnformasiya İnstitutunun şöbə müdiri olub.
1994-cü ildən Prezidentin İcra Aparatının ümumi şöbəsinə müdirlik edib, 1995-ci ildən Prezident Administrasiyasının rəhbəri idi.
“İstiqlal”, “Şərəf”, “Şöhrət” ordenləri ilə təltif olunub. Həqiqi dövlət müşaviridir.
