Naxçıvanda orta maaş 456 manatı ötüb
Naxçıvan Muxtar Respublikasının rəsmi statistika qurumu 2019-cu ilin sosial-iqtisadi göstəricilərini açıqlayıb. Novator.az bildirir ki, hesabata görə, yanvar-sentyabr aylarında ümumi daxili məhsul istehsalı 2 milyard 61,8 milyon manata yaxın olub, bu da bir il öncəki göstəricidən 1,5 faiz çoxdur. Hər nəfərə düşən ümumi daxili məhsul 4508 manat göstərilir: “Doqquz ayda muxtar respublikada 819,9 milyon manat dəyərində sənaye məhsulu istehsal olunub, bu da bir il öncəki göstəricini 1,3 faiz üstələyib”.
Əsas kapitala 790,8 milyon manat (bir il öncəki göstəricidən 1,4 faiz çox) vəsait yönəldildiyi, bir il öncəyə nisbətən 4,1 faiz çox, 372,3 milyon manatlıq kənd təsərrüfatı məhsulu istehsal olunduğu qeyd edilir.
Hesabata əsasən, nəqliyyat sektorunda yük daşınması 2,4 faiz, sərnişin daşınması 1,3 faiz artıb, informasiya və rabitə xidmətlərinin dəyəri 2018-ci ilin müvafiq dövründəki göstəricini 2,7 faiz üstələyib: “Yanvar-sentyabr aylarında muxtar respublikada sahibkarlara 20 milyon 386,4 min manat kredit verilib. Muxtar respublikada 383 növdə məhsul istehsal olunub, 108 ərzaq, 242 qeyri-ərzaq məhsuluna tələbat tamamilə yerli imkanlar hesabına ödənib.
Doqquz ayda muxtar respublikada 2908 yeni iş yeri yaradılıb, sentyabrın 1-nə orta aylıq əməkhaqqının məbləği 456,2 manata çatıb.
Yanvar-sentyabr aylarında muxtar respublikanın xarici ticarət dövriyyəsi 351 milyon 390,8 min ABŞ dolları təşkil edib, 307 milyon 559,3 min ABŞ dolları həcmində ixrac, 43 milyon 831,5 min ABŞ dolları həcmində idxal qeydə alınıb”.
