Milli Elmlər Akademiyasının prezidenti istefa verdi
Akademik Akif Əlizadə Azərbaycan Milli Elmlər Akademiyasının (AMEA) prezidenti vəzifəsindən istefa verib.
Məlumatı “Report” yayıb. Məlumatda bildirilir ki, Akif Əlizadənin istefa ərizəsi ilə əlaqədar oktyabrın 23-də AMEA-nın ümumi yığıncağı keçiriləcək. Yığıncaqda AMEA-ya yeni prezident seçiləcək.
AMEA-nın prezidenti ümumi yığıncaqda seçilir. Bu seçimi ölkə prezidenti təsdiqləyir.
Akif Əlizadə ilk dəfə 2013-cü ildə AMEA-nın prezidenti seçilib. 2018-ci ildə ümumi yığıncaq yenidən ona etimad göstərib.
Novator.az bildirir ki, Akif Əlizadə AMEA-nın onuncu prezidentidir. Yarandığı 1945-ci ildən bəri akademiyanın prezidenti postunu bu şəxslər də tutub: Mir Əsədulla Mirqasımov, Musa Əliyev, Yusif Məmmədəliyev, Zahid Xəlilov, Rüstəm İsmayılov, Həsən Abdullayev, Eldar Salayev, Fəraməz Maqsudov, Mahmud Kərimov.
Akif Əlizadənin 85 yaşı var. O, 1989-cu ildən AMEA-nın həqiqi üzvüdür.
