Mədəniyyət fərmanı və sərəncamında nələr var?
Prezident İlham Əliyev Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin 5 regional idarəsinin yaradılmasına fərman verib. Novator.az-ın məlumatına görə, oktyabrın 22-də imzalanan sənəd dövlət mühafizəsində olan daşınmaz tarix və mədəniyyət abidələrinin qorunması sahəsində nəzarəti gücləndirmək, idarəetmənin səmərəliliyini təmin etmək zərurəti ilə əsaslandırılıb.
Nazirlər Kabineti regional idarələrin ərazi mənsubiyyətini və işçilərinin say həddini müəyyən etməli; tarix və mədəniyyət abidələrinin qorunması sahəsində qanunvericiliyin təkmilləşdirilməsi və mədəni sərvətlərin qorunması üzrə tələblərin pozulmasına görə məsuliyyətin gücləndirilməsi ilə bağlı təkliflərini 3 ay müddətində hazırlamalı; regional idarələrin fəaliyyəti ilə bağlı zəruri tədbirlər həyata keçirməlidir.
Oktyabrın 22-də dövlət başçısı sərəncam da imzalayıb. Sərəncama əsasən, “Çıraqqala” və “Şabran şəhəri” tarixi qoruqlarının ərazisi “Çıraqqala-Şabran” Dövlət Tarix-Mədəniyyət Qoruğu, Şəmkir rayonunun tarixi ərazisi “Qədim Şəmkir Şəhəri” Dövlət Tarix-Mədəniyyət Qoruğu, Ağsu rayonunun tarixi ərazisi “Orta Əsr Ağsu Şəhəri” Dövlət Tarix-Mədəniyyət Qoruğu elan edilir.
Qoruqların idarə olunması Mədəniyyət Nazirliyinin səlahiyyətində olacaq.
Nazirlər Kabineti qoruqların sərhədlərini və mühafizə zonalarını Mədəniyyət Nazirliyi, Əmlak Məsələləri Dövlət Komitəsi, Azərbaycan Milli Elmlər Akademiyası, yerli icra hakimiyyətləri ilə birlikdə müəyyənləşdirib təsdiqləməlidir.
Sərəncamda Mədəniyyət Nazirliyinə “Nizami Gəncəvi məqbərəsi” kompleksinin Gəncə Dövlət Tarix-Mədəniyyət Qoruğunun tərkibində fəaliyyətini təmin etmək tapşırığı da yer alır.
