Bir nazirlik, komitə və agentlik İqtisadiyyat Nazirliyinə birləşdi
Oktyabrın 23-də fərman imzalayan prezident İlham Əliyev Vergilər Nazirliyi, Əmlak Məsələləri Dövlət Komitəsi və Antiinhisar və İstehlak Bazarına Nəzarət Dövlət Agentliyini müvafiq dövlət xidmətləri statusunda İqtisadiyyat Nazirliyinin strukturuna daxil edib.
İqtisadiyyat Nazirliyinin strukturuna daxil olan dövlət orqanlarının və onların tabeliyində olan qurumların strukturu, işçilərinin say həddi, hüquqi vəziyyəti, vəzifə maaşları, əməyin ödənilməsi sistemi və xidmətkeçmə ilə bağlı hüquq və vəzifələri ilkin mərhələdə dəyişməz olaraq qalır.
Nazirlər Kabineti İqtisadiyyat Nazirliyinin əsasnaməsinin yeni layihəsini iki ay müddətində hazırlamalıdır.
Oktyabrın 23-də Mikayıl Cabbarov vergilər naziri postundan azad edilərək iqtisadiyyat naziri vəzifəsinə təyinat alıb.
Əvvəlki iqtisadiyyat naziri Şahin Mustafayev oktyabrın 22-də baş nazirin müavini təyin edilib.
Əmlak Məsələləri Dövlət Komitəsinə 2005-ci ildən Kərəm Həsənov başçılıq edir.
Antiinhisar və İstehlak Bazarına Nəzarət Dövlət Agentliyi 2018-ci il aprelin 20-də İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti əsasında yaradılıb.
