Sülhün şərti
Türkiyə Silahlı Qüvvələrinin Suriyada apardığı hərbi əməliyyatlar müvəqqəti dayandırılıb. Novator.az-ın məlumatına görə, prezident Rəcəb Teyyub Ərdoğanın ABŞ-ın vitse-prezidenti Mayk Penslə görüşündə belə razılaşma əldə olunub.
Suriyada 2011-ci ilin mart ayında prezident Bəşər Əsədin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. Ölkənin Türkiyə ilə sərhəd bölgələrinə nəzarət kürd yaraqlılarının nəzarətinə keçib. Onlar Türkiyədəki kürd separatçılarına dəstək verirlər.
Türkiyə Silahlı Qüvvələri oktyabrın 9-da sərhəd boyu məskən salan kürd qruplaşmalarını bölgədən sıxışdırıb çıxarmaq üçün Suriyada hərbi əməliyyata başlayıb, xeyli ərazini terrorçulardan təmizləyib.
ABŞ başda olmaqla Qərb ölkələri bu əməliyyatı pisləyib, Türkiyəni sanksiyalarla hədələyib.
Oktyabrın 17-si Ankarada Türkiyə prezidenti ilə bir araya gələn ABŞ vitse-prezidenti Mayk Pens Rəcəb Teyyub Ərdoğanı əməliyyatları 5 günlük dayandırmağa razı salıb. Bunun əvəzində kürdlərin ordusu sərhəd zolağından Türkiyənin tələb etdiyi məsafəyə çəkilməli, ağır silahlarını təhvil verməlidir. ABŞ Türkiyəyə sanksiya tətbiq etməməyə, əvvəlki sanksiyaları aradan qaldırmağa da boyun olub.
Nümayəndə heyətlərinin iştirakı ilə keçirilən Ərdoğan – Pens görüşü 4 saat 20 dəqiqə davam edib.
