Ən yeni iqtisadi göstəricilər
Dövlət Statistika Komitəsi makroiqtisadi göstəriciləri açıqlayıb. Novator.az bildirir ki, rəsmi hesabata görə, 2019-cu ilin yanvar-sentyabr aylarında kənd təsərrüfatının ümumi məhsulu ötən ilin doqquz ayı ilə müqayisədə 7,1 faiz (bitkiçilik məhsullarının istehsalı 11 faiz, heyvandarlıq məhsullarının istehsalı 3,1 faiz) artıb.
Nəqliyyat sektorunda yük daşınmasının 1,6 faiz, sərnişin daşınmasının 2,1 faiz, informasiya və rabitə xidmətlərinin həcminin dəyər ifadəsində 16,4 faiz, əmtəə dövriyyəsinin 3 faiz, əhaliyə göstərilmiş ödənişli xidmətlərdən əldə olunan gəlirin 2,1 faiz yüksəldiyi qeyd olunur.
Məlumata əsasən, doqquz ayda əhalinin gəlirləri nominal ifadədə 6,7 faiz artaraq 42,2 milyard manata çatıb.
Yanvar-sentyabr aylarında dövlət büdcəsinə 16 milyard 871,2 milyon manat vəsait daxil olduğu, büdcədən 16 milyard 690,6 milyon manat vəsait xərcləndiyi, 180,6 milyon manat artıqlıq yarandığı vurğulanır.
Sentyabrın 1-nə ölkənin bank və digər kredit təşkilatlarının kredit portfeli milli valyuta ekvivalentində 13 milyard 865,5 milyon manat, əhalinin banklardakı əmanətlərinin milli valyuta ekvivalentində məbləği 8 milyard 561,8 milyon manat olub.
Yanvar-sentyabr aylarında ümumi daxili məhsul əvvəlki ilin eyni dövrü ilə müqayisədə 2,5 faiz, sənaye istehsalı 1,7 faiz artıb, iqtisadi və sosial sahələrə 10 milyard 146,2 milyon manat vəsait yönəldilib.
Doqquz ayda 2,6 faiz inflyasiya getdiyi bildirilir.
