Bələdiyyə seçkiləri təyin olundu
Azərbaycanda növbəti bələdiyyə seçkiləri dekabrın 23-də keçiriləcək. Novator.az-ın məlumatına görə, qərarı oktyabrın 18-də Mərkəzi Seçki Komissiyası verib.
Azərbaycanda 1606 bələdiyyə var. Əhalisi 500-dən az olan ərazilərdə 5 bələdiyyə üzvü; 999-dək olan ərazilərdə 7 bələdiyyə üzvü; 4999-dək olan ərazilərdə 9 bələdiyyə üzvü; 9999-dək olan ərazilərdə 11 bələdiyyə üzvü; 19999-dək olan ərazilərdə 13 bələdiyyə üzvü; 49999-dək olan ərazilərdə 15 bələdiyyə üzvü; 99999-dək olan ərazilərdə 17 bələdiyyə üzvü; 299999-dək olan ərazilərdə 19 bələdiyyə üzvü seçilir.
23 dekabr seçkiləri ölkədə bələdiyyə institutu yaradılandan bəri beşinci seçkilər olacaq. Əvvəlki seçkilər 12 dekabr 1999-cu ilə, 17 dekabr 2004-cü ilə, 23 dekabr 2009-cu ilə, 23 dekabr 2014-cü ilə düşüb.
Son rəsmi hesabata görə, ölkədə 5 milyon 212 min 902 nəfər seçici var.
