Yeni agentliyin əsasnaməsində nələr var?
Novator.az Maliyyə Nazirliyi yanında Dövlət Borcunun və Maliyyə Öhdəliklərinin İdarə Edilməsi Agentliyinin əsasnaməsinə nəzər salıb.
Bu il yanvarın 17-də Maliyyə Nazirliyinin Dövlət Borcunun İdarə Edilməsi Agentliyi prezident fərmanı ilə ləğv edilmiş və onun funksiyaları nazirliyin aparatına verilmişdi. Oktyabrın 16-da fərman imzalayan prezident İlham Əliyev Maliyyə Nazirliyi yanında Dövlət Borcunun və Maliyyə Öhdəliklərinin İdarə Edilməsi Agentliyi yaradıb.
Əsasnaməsinə görə, Dövlət Borcunun və Maliyyə Öhdəliklərinin İdarə Edilməsi Agentliyi dövlət borcalmalarının həyata keçirilməsini təmin edən, dövlət borcunun və maliyyə öhdəliklərinin idarə olunmasını, dövlət borcunun təkrar maliyyələşdirilməsini həyata keçirən, vahid xəzinə hesabının sərbəst qalığını və dövlət borcu və zəmanəti üzrə öhdəliklərin təminat fondunun vəsaitini idarəetməyə verən və ya idarə edən, dövlət borcunun, dövlət zəmanətlərinin və xarici dövlətlərin Azərbaycana olan borcunun reyestrini aparan, habelə dövlət qiymətli kağızlarının emissiyasını həyata keçirən qurumdur.
Agentliyin vəzifələri sırasında hər il növbəti büdcə ili üzrə dövlət büdcəsinin və icmal büdcənin layihələri və sonrakı üç il üçün icmal büdcənin göstəriciləri hazırlanarkən daxili və xarici dövlət borcunun və büdcə ili ərzində veriləcək dövlət zəmanəti məbləğinin yuxarı hədləri (limitləri) barədə təkliflər hazırlamaq; dövlət borcuna xidmət xərclərinin, o cümlədən əsas məbləğin və faizin qaytarılması üzrə xərclərin ödənilməsi ilə bağlı vəsait ayrılmasının müvafiq büdcə ili üçün dövlət büdcəsi haqqında qanunda nəzərdə tutulması barədə təkliflər vermək; borc öhdəliklərinin şərtlərini və maliyyə bazarlarından maliyyə vəsaitlərinin cəlb edilməsi imkanlarını qiymətləndirmək; müvafiq il üçün dövlət borcunun və dövlət zəmanətinin yuxarı hədlərinə (limitlərinə) əməl olunmasını təmin etmək; dövlət borcuna və dövlət zəmanəti üzrə yaranmış borca xidmət göstərilməsini və dövlət borcunun vaxtında qaytarılmasını təmin edən tədbirlər görmək; dövlət borcalmaları və ya dövlət zəmanəti ilə alınmış vəsaitlərdən təyinatı üzrə istifadəyə nəzarət etmək, dövlət borcundan və ya dövlət zəmanəti ilə alınmış borcdan istifadə qaydalarının pozulması hallarını aşkar etdikdə bu barədə məlumat vermək kimi məsələlər yer alır.
Agentliyin fəaliyyətinə maliyyə nazirinin vəzifəyə təyin etdiyi direktor rəhbərlik edir.
1 iyul 2019-cu ilə Azərbaycanın xarici dövlət borcu 8 milyard 920 milyon ABŞ dolları, borcun ümumi daxili məhsula (ÜDM) nisbəti 19 faiz göstərilib.
