Hər adama 5,9 min manat düşür
2019-cu ilin yanvar-sentyabr aylarında ölkədə 58 milyard 464,2 milyon manatlıq və ya əvvəlki ilin eyni dövrü ilə müqayisədə 2,5 faiz çox ümumi daxili məhsul (ÜDM) istehsal edilib. Novator.az-ın məlumatına görə, Dövlət Statistika Komitəsi iqtisadiyyatın qeyri neft-qaz sektorunda əlavə dəyərin 3,5 faiz, neft-qaz sektorunda 1,1 faiz artdığını bildirir.
Əhalinin hər nəfərinə düşən ÜDM 5910,1 manat göstərilir.
Hesabata əsasən, doqquz ayda sənayedə 34,7 milyard manatlıq və ya 2018-ci ilin müvafiq dövrü ilə müqayisədə 1,7 faiz çox sənaye məhsulu istehsal olunub, qeyri neft-qaz sektorunda məhsul istehsalı 15,6 faiz artıb.
Yanvar-sentyabr aylarında pərakəndə ticarət şəbəkəsində satılmış məhsulların dəyərinin əvvəlki ilin eyni dövrünün səviyyəsini müqayisəli qiymətlərlə 3 faiz üstələyərək 27,6 milyard manata çatdığı vurğulanır.
