Finalçılar və yolçular
Novator.az Avropa futbol çempionatının seçmə mərhələsindəki turnir vəziyyətinə nəzər salıb.
10 qrupa bölünmüş 55 milli komandanın mübarizəsi noyabr ayında başa çatır. Final raunduna qruplarda ilk iki yeri tutan yığmalar adlayır.
İ qrupunda məsələ həll olunub: Belçika və Rusiya final mərhələsinə vəsiqəni təmin ediblər.
B qrupunda Ukrayna final mərhələsinə bilet alıb. İkinci vəsiqəyə Portuqaliya (11 xal) və Serbiya (10 xal) iddialıdır.
F qrupunda İspaniya final raunduna keçib. Digər final bileti üçün İsveç (15 xal), Rumıniya (14 xal) və Norveç (11 xal) yarışır.
G qrupunda Polşa finala çıxıb. İkinci vəsiqə üçün mübarizə aparan Avstriya 16, Şimali Makedoniya, Sloveniya və İsrail 11 xal toplayıb.
J qrupunda İtaliya final mərhələsinə vəsiqə alıb. Digər vəsiqəyə Finlandiya (15 xal), Ermənistan və Bosniya (10 xal) namizəddir.
A qrupunda final şansları qalan İngiltərənin 15, Çexiyanın 12, Kosovonun 11 xalı var.
C qrupunda finala çıxmaq imkanları olan Hollandiya və Almaniya 15, Şimali İrlandiya 12 xal əldə edib.
D qrupunda vəsiqələrə 12 xalla İrlandiya və Danimarka, 11 xalla İsveçrə namizəddir.
E qrupunda 1 xal yığan Azərbaycan milli komandası final şansını itirib. Xorvatiya 14, Macarıstan 12, Slovakiya 10, Uels 8 xal yığıb.
H qrupunda şanslı komandalardan Türkiyə və Fransanın 19, İslandiyanın 15 xalı var.
Avropa çempionatının final mərhələsi 2020-ci ilin yayında Bakı, Sankt-Peterburq, Buxarest, Budapeşt, Kopenhagen, Amsterdam, Münhen, Roma, Bilbao, London, Dublin, Qlazqo şəhərlərində keçiriləcək. Bakı Olimpiya Stadionu 3 qrup oyununa, 1 dörddə bir finala ev sahibliyi edəcək.
