Zirvədən zirvəyə
Oktyabrın 15-i Bakıda Türkdilli Dövlətlərin Əməkdaşlıq Şurasının zirvə görüşü keçirilib. AZƏRTAC xəbər verir ki, görüşdə Azərbaycan prezidenti İlham Əliyev, Qırğızıstan prezidenti Sooronbay Jeenbekov, Qazaxıstanın birinci prezidenti Nursultan Nazarbayev, Türkiyə prezidenti Rəcəb Teyyub Ərdoğan, Özbəkistan prezidenti Şövkət Mirziyayev, Macarıstanın baş naziri Viktor Orban, Türkmənistan Nazirlər Kabineti sədrinin müavini Purli Ağamuradov, Türkdilli Dövlətlərin Əməkdaşlıq Şurasının baş katibi Bağdad Amreyev çıxış ediblər.
Türkdilli Dövlətlərin Əməkdaşlıq Şurasının fəxri sədri Nursultan Nazarbayevə “Türk dünyasının ali ordeni” təqdim olunub.
Sənədlərin imzalanması mərasimindən sonra növbəti zirvə görüşünün Türkiyədə keçiriləcəyi bəyan olunub.
Türkdilli Dövlətlərin Əməkdaşlıq Şurası (Türk Şurası) 1989-2019-cu illərdə Qazaxıstana rəhbərlik etmiş (əvvəl Mərkəzi Komitənin birinci katibi, sonra eyni zamanda Ali Sovetin sədri kimi, daha sonra prezident kimi) Nursultan Nazarbayevin təşəbbüsü ilə yaradılıb. Təşkilat 2009-cu ildə türkdilli dövlət başçılarının sammitində Azərbaycan, Qazaxıstan, Qırğızıstan və Türkiyənin imzaladığı Naxçıvan sazişinə müvafiq olaraq təsis edilib.
2018-ci ildə Macarıstan Türk Şurasında müşahidəçi statusu alıb.
2019-cu ildə Özbəkistan Türk Şurasına qoşulmaq haqqında qərar qəbul edib.
Türk Şurasının sammitlərinə və müxtəlif tədbirlərinə Türkmənistan da qatılır.
