Vasim Məmmədəliyevlə vida
Oktyabrın 14-ü Bakı Dövlət Universitetində akademik Vasim Məmmədəliyevlə vida mərasimi keçirilib, sonra mərhum paytaxtdakı İkinci Fəxri xiyabanda torpağa tapşırılıb.
Bakı Dövlət Universitetinin şərqşünaslıq fakültəsinin ərəb filologiyası kafedrasının müdiri, əməkdar elm xadimi, prezident təqaüdçüsü, “Şöhrət” və “Şərəf” ordenli Vasim Məmmədəliyev oktyabrın 13-də vəfat edib.
Vasim Məmmədəliyev 1942-ci ildə Bakıda anadan olub. 1964-cü ildə BDU-nun şərqşünaslıq fakültəsini bitirib, sonra Bakıda və Tbilisidə aspirantura təhsili alıb. 1968-ci ildə “Müasir ərəb, Azərbaycan dillərində və Bağdad dialektində feilin zaman formalarının müqayisəli-tipoloji təhlili” mövzusunda namizədlik, 1974-cü ildə “Müasir ərəb ədəbi dilinin feilin zaman, şəxs və şəkil kateqoriyaları” mövzusunda doktorluq dissertasiyası müdafiə edib.
1981-1991-ci illərdə BDU-nun şərqşünaslıq fakültəsinin dekanı, 1991-1992-ci illərdə universitetin humanitar fakültələr üzrə prorektoru, 1993-2018-ci illərdə ilahiyyat fakültəsinin dekanı vəzifələrində çalışıb.
1978-ci ildə professor elmi adını alıb, 2001-ci ildə Azərbaycan Milli Elmlər Akademiyasının müxbir üzvü, 2007-ci ildə həqiqi üzvü seçilib.
Onun ərəb dilçiliyi və ədəbiyyatşünaslığının müxtəlif problemlərinə həsr edilən, islam, şəriət, fiqh, musiqi və ədəbiyyata dair yüzlərlə elmi əsəri, 41 kitabı nəşr olunub.
Alimin rəhbərliyi altında 40 fəlsəfə doktoru, 5 elmlər doktoru hazırlanıb.
Vasim Məmmədəliyev 1991-ci ildə akademik Ziya Bünyadovla birgə “Qurani-Kərim”i Azərbaycan dilinə tərcümə edib.
Allah rəhmət eləsin!
