Tunisdə yeni prezident
Tunisdə prezident seçkisinin ikinci turu 1958-ci il təvəllüdlü hüquq professoru Kais Səidin qələbəsi ilə başa çatıb. Novator.az-ın məlumatına görə, o, oktyabrın 13-də keçirilmiş seçkidə 72%-dən çox səs toplayaraq media maqnatı Nabil Karuini qabaqlayıb. Həbsdən oktyabrın 9-da buraxılan Nabil Karui 27,5% səs yığıb.
Ölkədə növbəti prezident seçkisi noyabrın 17-də olmalı idi. Dövlət başçısı Beci Kaid Əs-Səbsi iyulun 25-də vəfat etdiyindən səsvermə qabağa çəkilib.
Sentyabrın 15-də keçirilmiş ilk turda 24 namizəd yarışıb, heç kim 50%-dən çox səs yığa bilməyib, Kais Səid və korrupsiya, vergidən yayınma, çirkli pulların yuyulması ittihamları ilə həbsdə olan Nabil Karui ikinci tura adlayıblar.
