Əməliyyatların yeni hesabatı
Türkiyə Silahlı Qüvvələrinin Suriyada apardığı hərbi əməliyyatların yeni hesabatı yayılıb.
Oktyabrın 9-da başlayan əməliyyatın məqsədi Türkiyə ilə sərhəd boyu məskən salan kürd qruplaşmalarını bölgədən sıxışdırıb çıxarmaqdır. Novator.az bildirir ki, oktyabrın 14-dək 550 terrorçunun öldürüldüyü, 1 şəhərin, 1 qəsəbənin, 56 kəndin təmizləndiyi açıqlanıb.
Azərbaycanın Xarici İşlər Nazirliyi hərbi əməliyyatlara belə münasibət bildirib: “Azərbaycan terrorizmin bütün forma və təzahürlərini qəti şəkildə pisləyir və beynəlxalq ictimaiyyətin terrorizmə qarşı mübarizədə səylərini dəstəkləyir. Bu mənada biz əminik ki, Türkiyə hökumətinin bəyan etdiyi kimi, Türkiyə Silahlı Qüvvələrinin həyata keçirdiyi “Sülhün mənbəyi” əməliyyatı Suriyanın ərazi bütövlüyü çərçivəsində terror riskinin aradan qaldırılmasına, qaçqınların öz evlərinə qayıtmasına, humanitar problemlərin həll edilməsinə, sülh və sabitliyin təmin edilməsinə xidmət edəcək”.
Azərbaycan prezidentinin ictimai-siyasi məsələlər üzrə köməkçisi Əli Həsənov “Facebook” sosial şəbəkəsindəki yazıb ki, “Sülhün mənbəyi” əməliyyatı ciddi silahlı qarşıdurma müşahidə olunan Suriya ilə həmsərhəd ərazilərdə terror riskinin minimuma endirilməsi, bu ölkədən milyonlarla qaçqının təhlükəsizliyinin təmin edilməsi, onların üzləşdiyi humanitar problemlərin aradan qaldırılması və sabitliyin təmin olunması üçün digər məsələlərin həlli məqsədini daşıyır: “Suriyada münaqişə başlayan dövrdən bu ölkə ilə həmsərhəd olan Türkiyə ciddi qaçqın axını ilə üzləşib. Təəssüf ki, beynəlxalq birlik bu problemin həllinə dəstək göstərməyib. Belə olan təqdirdə Suriya ərazisində təhlükəsiz zonanın yaradılması və qaçqınların həmin ərazilərdə, öz doğma torpaqlarında məskunlaşdırılması məqsədilə həyata keçirilən əməliyyat mövcud problemin ən rasional həlli variantıdır”.
Suriyada 2011-ci ilin mart ayında prezident Bəşər Əsədin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. Ölkənin Türkiyə ilə sərhəd bölgələrinə nəzarət kürd yaraqlılarının nəzarətinə keçib. Onlar Türkiyədəki kürd separatçılarına dəstək verirlər.
