İqtisadiyyat üzrə Nobel mükafatı 3 alimə verildi
2019-cu ilin iqtisadiyyat üzrə Nobel mükafatına ABŞ-ın Massaçusets Texnologiya İnstitutunun hindistanlı professoru Abicit Banerci, fransalı professoru Ester Dyüflo və Harvard Universitetinin (ABŞ) professoru Maykl Kremer layiq görülüblər. Novator.az bildirir ki, qərarı İsveç Elmlər Akademiyası oktyabrın 14-də açıqlayıb.
İqtisadçı alimlərin qlobal yoxsulluqla mübarizədə göstərdikləri səylərə görə mükafatlandırıldığı bəyan edilib.
Nobel mükafatının məbləği 9 milyon İsveç kronudur (1,5 milyon manat).
2019-cu ilin fiziologiya və tibb üzrə Nobel mükafatını Uilyam Kelin, Qreqq Semenza (hər ikisi ABŞ) və Peter Ratkliff (Böyük Britaniya), fizika üzrə Nobel mükafatını Ceyms Piblz (Kanada və ABŞ), Didye Keloz və Mişel Mayor (hər ikisi İsveçrə), kimya üzrə Nobel mükafatını Con Qudenaf (ABŞ), Stenli Uittinqhem (Böyük Britaniya) və Akira Yoşino (Yaponiya) alıb.
2018-ci ilin ədəbiyyat üzrə Nobel mükafatına polşalı şairə Olqa Tokarçuk, 2019-cu ilin Nobel mükafatına isə avstriyalı yazıçı Peter Handke layiq görülüb.
2019-cu ilin Nobel sülh mükafatı Efiopiyanın baş naziri Abiy Əhməd Əliyə verilib.
Səidə Hüseynova
