Parlamentə təqdimat: baş nazir dəyişir
Milli Məclisin 8 oktyabr iclasının gündəliyinə Əli Hidayət oğlu Əsədovun baş nazir vəzifəsinə təyinatına razılıq verilməsi haqqında məsələ daxil edilib.
Novator.az bildirir ki, Əli Əsədov hazırda prezidentin iqtisadi məsələlər üzrə köməkçisi, Prezident Administrasiyasının şöbə müdiridir.
1956-cı il noyabrın 30-u Naxçıvan şəhərində anadan olan Əli Əsədov Moskva Xalq Təsərrüfatı İnstitutunu bitirib. Azərbaycan Elmlər Akademiyasının İqtisadiyyat İnstitutunda baş laborant, kiçik elmi işçi, elmi işçi, Bakı Sosial İdarəetmə və Politologiya İnstitutunda dosent, kafedra müdiri vəzifələrində çalışıb.
1995-2000-ci illərdə Milli Məclisin deputatı olub.
1998-ci ildən prezidentin iqtisadi məsələlər üzrə köməkçisi, 2012-ci ildən Prezident Administrasiyası rəhbərinin müavini vəzifələrində işləyib, 2017-ci ildə prezidentin iqtisadi məsələlər üzrə köməkçisi-şöbə müdiri təyin edilib.
2018-ci il aprelin 21-dən baş nazir postunu Novruz Məmmədov tutur.
Prezidentin yuxarı icra orqanı olan Nazirlər Kabinetinin tərkibinə baş nazir, onun müavinləri, nazirlər və başqa mərkəzi icra hakimiyyəti orqanlarının rəhbərləri daxildir. Qurumun əsas səlahiyyətləri dövlət büdcəsinin hazırlanması və icrası, maliyyə-kredit və pul siyasətinin, dövlət iqtisadi və sosial proqramlarının həyata keçirilməsi, nazirliklərə və digər mərkəzi icra hakimiyyəti orqanlarına rəhbərlikdir.
Konstitusiyanın 118-ci maddəsinə görə, baş naziri Milli Məclisin razılığı ilə prezident təyin edir.
