Təbriklər
Azərbaycan prezidentinin mətbuat xidmətinin məlumatına görə, dövlət başçısı İlham Əliyev oktyabrın 7-də rusiyalı həmkarı Vladimir Putinə zəng edib, ona ad günü münasibətilə təbriklərini çatdırıb, uğurlar və cansağlığı arzulayıb. Telefon söhbəti zamanı prezidentlər ikitərəfli münasibətlərin daha da inkişaf etdirilməsi ilə bağlı və qarşılıqlı maraq doğuran məsələlər ətrafında fikir mübadiləsi aparıblar.
Novator.az bildirir ki, oktyabrın 7-də Vladimir Putinin 67 yaşı tamam olur.
1952-ci il oktyabrın 7-də Leninqrad (Sankt-Peterburq) şəhərində doğulan Vladimir Putin Leninqrad Dövlət Universitetinin hüquq fakültəsini və DTK-nın Moskva Ali Məktəbini bitirib. 1975-1990-cı illərdə təhlükəsizlik orqanlarında çalışıb.
1990-cı ildən Vladimir Putin əvvəl Leninqrad Dövlət Universiteti rektorunun köməkçisi, sonra Leninqrad Şəhər Soveti sədrinin müşaviri postlarını tutub.
1991-ci ildən Sankt-Peterburq meriyasında çalışıb, 1994-cü ildən Sankt-Peterburq hökuməti sədrinin birinci müavini olub.
Vladimir Putin 1996-cı ildən Rusiyanın ali hakimiyyət orqanlarında işləyib, prezidentin işlər müdirinin müavini, Prezident Administrasiyası rəhbərinin birinci müavini, Federal Təhlükəsizlik Xidmətinin direktoru, Təhlükəsizlik Şurasının katibi olub.
1999-cu il avqustun 16-da baş nazir təyin edilib. 1999-cu il dekabrın 31-dən həmçinin prezident vəzifəsini icra edib. 2000-ci ildə prezident seçilib. 2004-cü il seçkisində bu postu əlində saxlayıb.
2008-ci ilin may ayından Rusiyanın baş naziri olub. 2012-ci ildə yenidən prezident seçilib, 2018-ci il seçkisində postunu qoruyub.
