Klub reytinqinə nəzər
UEFA Çempionlar Liqası və Avropa Liqasının qrup mərhələlərində iki tur arxada qalıb. Novator.az bildirir ki, klub reytinqinə İspaniya başçılıq edir. İlk beşlikdə İngiltərə, Almaniya, İtaliya və Fransa da yer alır.
Rusiya 6-cı, Ukrayna 10-cu, Türkiyə 11-ci, Qazaxıstan 25-ci, Azərbaycan 26-cı yerdədir.
Klub reytinqi Çempionlar Liqası və Avropa Liqasında son beş mövsümdə qazanılan əmsala əsaslanır. Qrup raunduna qədər qələbə 1, heç-heçə 0,5 xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Azərbaycan bu mövsüm 2,875 əmsal qazanıb.
Ölkə UEFA-nın klub turnirlərinə 4 komanda ilə qatılıb. Qrup raundunadək “Qarabağ” gəlib çıxa bilib. Azərbaycan təmsilçisi Avropa Liqasının A qrupunda İspaniyanın “Sevilya”, Kiprin APOEL və Lüksemburqun “Düdelanj” komandaları ilə yarışır, 3 xalı var.
Mövsümün əmsallar cədvəlinə Hollandiya başçılıq edir: 6,400 əmsal. 2019-2020-ci illər mövsümündə UEFA-nın klub turnirlərinə 237 komanda (Çempionlar Liqasına 79, Avropa Liqasına 158) buraxılıb. Mübarizəni qrup raundlarında 55 UEFA üzvündən 29-nun təmsilçiləri davam etdirir: Çempionlar Liqasında 32, Avropa Liqasında 48 klub oynayır.
