Qubad İbadoğlunun hökumətə təklifləri
Azərbaycan Demokratiya və Rifah (ADR) Hərəkatının sədri, iqtisadçı Qubad İbadoğlu hökumətə təkliflər ünvanlayıb. Novator.az-ın məlumatına görə, ekspert özünün “Facebook” səhifəsində təklifləri belə sıralayır:
1) Son illər doğum tempinin davamlı xarakter alması, bəzi yaş qrupları üzrə uşaqların boy-çəki göstəricilərinin pisləşməsi və uşaqlar üçün istehlak büdcəsinin bahalaşması səbəbindən 1 yanvar 2020-ci ildən hamiləliyə və doğuşa görə müavinət artırılsın, 18 yaşına çatanadək hər bir uşağa cari ilin uşaqlar üçün hesablanan yaşayış minimumu səviyyəsində vəsait ödənsin, uşaqların və hamilə qadınların məcburi tibbi sığorta haqları dövlət hesabına qarşılansın.
2) Şəhid ailələrinin və Qarabağ müharibəsi əlillərinin imtiyazlı mənzil təminatı proqramını başa çatdlrmaq üçün 2020-ci üçün sosial investisiya xərclərinin proqnozlaşdırılması zamanı 300 milyon manat vəsait bu məqsəd üçün nəzərdə tutulsun.
3) Təbii qaz və elektrik enerjisinin əhali qrupuna satış tarifləri üçün tətbiq edilən limitlər 2019-cu il noyabrın 1-dən ləğv edilsin.
4) Əməkhaqqı artımından sosial müdafiə büdcəsinə daxilolmaların çoxalmasını və pensiyaçıların sayının azalmasını nəzərə alaraq 2020-ci il yanvarın 1-dən pensiyaların minimum məbləği 250 manata çatdırılsın.
2020-ci il iyul ayının 1-dən pensiya yaşı kişilər üçün 64, qadınlar üçün 61,5 yaş həddində saxlansın.
5) Növbəti tədris ilindən dövlət ali təhsil müəssisələrində ödənişli ixtisaslarda təhsil alanların sayı tələbələrin 50 faizinə qədər azaldılsın, bütün dövlət universitetlərinə publik hüquqi şəxs statuslu institusional və maliyyə muxtariyyatı verilsin.
