Sərhəddə üç nəfər öldürülüb
Dövlət Sərhəd Xidməti məlumat yayıb. Xəbərə görə, oktyabrın 2-nə keçən gecə saat 00:13 radələrində Sərhəd Qoşunlarının “Horadiz” sərhəd dəstəsinin Beyləqan rayonunun Əmirzeyitli kəndi yaxınlığındakı zastavasının xidməti ərazisində 3 nəfər naməlum şəxsin dövlət sərhədini pozması müşahidə olunub: “Sərhəd zastavası “Silaha” komandası üzrə qaldırılıb, xidməti ərazi tam qapadılıb. “Dayan” əmri verilərək sərhəd pozucuları təqib edilib və havaya xəbərdarlıq atəşi açılıb.
Lakin sərhəd pozucuları əmrə tabe olmayıb, sərhəd naryadına qarşı odlu silahdan atəş açıb, 1 sərhəd pozucusu çantasını ataraq İran istiqamətində qaçmağa, digər 2-si hadisə yerindən digər istiqamətdə qaçmağa cəhd göstəriblər.
Silah tətbiq olunub və hər 3 sərhəd pozucusu aldıqları güllə yaralarından hadisə yerində vəfat ediblər.
Zərərsizləşdirilmiş sərhəd pozucularına və əraziyə baxış zamanı çəkisi təxminən 15 kiloqram olan müxtəlif növlü narkotik vasitələr, lüləsi kəsilmiş tüfəng, patronlar və gilizlər aşkar olunub”.
