Penitensiar Xidmətdən Şəfəq Ağacan təkzibi
Penitensiar Xidmət məhbus jurnalist Şəfəq Ağacanın aclıq aksiyası keçirməsini təkzib edib.
Bakı İstintaq Təcridxanasında saxlanan Şəfəq Ağacanın aclıq aksiyası keçirdiyini sentyabrın 30-da onun təsisçisi və baş redaktoru olduğu Bakupress.az saytı yayıb.
Oktyabrın 2-də Report.az-a danışan Penitensiar Xidmətin ictimaiyyətlə əlaqələr şöbəsinin rəisi Mehman Sadıqov deyib ki, Şəfəq Ağacan su və qida qəbul edir: “Penitensiar Xidmətin rəsmi şəxsi Bakı İstintaq Təcridxanasında məhkumların və həbs edilmiş şəxslərin qəbulunu keçirib. Şəfəq Ağacan da həmin qəbulda olub, onunla söhbət aparılıb. O, heç bir probleminin olmadığını, aclıq aksiyası keçirmədiyini bildirib”.
Novator.az-ın məlumatına görə, 1976-cı il təvəllüdlü Şəfəq Ağacan Sumqayıtdakı 27 saylı orta məktəbin məzunudur. Bakı Slavyan Universitetini filoloq ixtisası ilə bitirib.
Jurnalist mayın 1-i Bakıda tutulub. İttihama görə, o, paytaxtın Nərimanov rayonunda, 5 saylı xəstəxananın qarşısında çəkisi 311 qramdan çox olan qurudulmuş marixuananı 100 ABŞ dolları və 1830 manata satarkən yaxalanıb.
Jurnalist ittihamları qəbul etmir, şərləndiyini deyir.
Sentyabrın 27-də Xətai Rayon Məhkəməsi Şəfəq Ağacanın barəsində seçilmiş həbs qətimkan tədbirini 2 ay uzadıb. Şəfəq Ağacanın buna etiraz olaraq aclıq aksiyasına başladığı bəyan edilib.
