Mandat alındı
Mərkəzi Seçki Komissiyası oktyabrın 2-də Rafael Cəbrayılovun deputat mandatına xitam verib.
Rafael Cəbrayılov Milli Məclis üzvlüyündən bu həftə imtina edib. Parlament rəhbərliyinə müraciətində Rafael Cəbrayılov seçicilərindən və Azərbaycan ictimaiyyətindən üzr istədiyini vurğulayıb.
Son vaxtlar Rafael Cəbrayılovun vətəndaşların külli miqdarda vəsaitini mənimsəməsi, buna görə məhkəməyə verilməsi barədə xəbərlər yayılıb.
Novator.az bildirir ki, Rafael Cəbrayılov 1958-ci ildə doğulub. Hüquqşünasdır. Uzun illər prokurorluq sistemində çalışıb. Ədliyyə polkovnik-leytenantıdır.
Mərkəzi Seçki Komissiyasının 2 oktyabr qərarı ilə Milli Məclisdə boş deputat yerlərinin sayı 7-yə çatıb.
2015-ci il noyabrın 1-də keçirilmiş seçkidə 124 nəfər Milli Məclisə mandat alıb. 2016-cı il iyunun 18-də keçirilmiş təkrar seçkidə daha 1 nəfər deputat seçilib.
2017-ci ildə 14 saylı Xəzər dairəsindən deputat Mehriban Əliyeva birinci vitse-prezident təyin olunub.
2018-ci ildə 120 saylı Cəbrayıl-Qubadlı dairəsindən deputat Astan Şahverdiyev vəfat edib.
Həmin il 34 saylı Xətai dairəsindən deputat Fuad Muradov Diasporla İş üzrə Dövlət Komitəsinin sədri, 43 saylı Sumqayıt dairəsindən deputat Muxtar Babayev ekologiya və təbii sərvətlər naziri, 91 saylı Ucar dairəsindən deputat Vüsal Hüseynov Dövlət Miqrasiya Xidmətinin rəisi, 101 saylı Göygöl-Daşkəsən dairəsindən deputat Rövşən Rzayev Qaçqınların və Məcburi Köçkünlərin İşləri üzrə Dövlət Komitəsinin sədri postuna təyinat alıb.
