Manata 4,5 milyard dollar xərclənib
Oktyabrın 2-də Dövlət Neft Fondu rəsmi hesabat yayıb. Qeyd olunur ki, fond Mərkəzi Bankın 2019-cu ilin sentyabr ayında keçirdiyi valyuta hərraclarında 618,9 milyon ABŞ dolları məbləğində vəsait satıb.
Bununla doqquz ayın ümumi xərci 4 milyard 512,8 milyon dollara çatıb. Novator.az bildirir ki, yanvarın hərraclarında fonddan 634,9 milyon dollar, fevralın hərraclarında 316,2 milyon dollar, martın hərraclarında 600,5 milyon dollar, aprelin hərraclarında 423,7 milyon dollar, mayın hərraclarında 352,4 milyon dollar, iyunun hərraclarında 315,9 milyon dollar, iyulun hərraclarında 434,9 milyon dollar, avqustun hərraclarında 815,4 milyon dollar alınıb.
ABŞ dollarının rəsmi qiyməti 2018-ci il martın 7-dən 1,7 manatdır.
2015-ci il fevralın 21-də və dekabrın 21-də baş verən iki devalvasiya nəticəsində dolların rəsmi kursu 0,7862 manatdan 1,5594 manata qalxıb.
2016-cı ildə rəsmi qiymət 1,7707 manata çatıb, 2017-ci il dekabrın 13-dən 2018-ci il martın 7-dək dollar banklara 1,7001 manata təklif olunub.
2016-cı ildə Dövlət Neft Fondu manatı qorumağa 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar sərf edib.
Avro 2019-cu ilə 1,9323, Gürcüstan larisi 0,6346, Rusiya rublu 0,0245, Türkiyə lirəsi 0,3141 manatla başlayıb.
Oktyabrın 2-də avro 1,8587, lari 0,5704, rubl 0,0260, lirə 0,2974 manata satılır (Valyutalar).
