Bakının mərkəzində yol təzələnir
Bakının Yasamal rayonunda Şəfayət Mehdiyev küçəsinin Hüseyn Cavid parkına çıxışını təmin etmək üçün yenidənqurma işləri aparılır. Azərbaycan Avtomobil Yolları Dövlət Agentliyinin 2 oktyabr məlumatına görə, Əbdürrəhim bəy Haqverdiyev küçəsindən Landau küçəsinə qədər uzanan 800 metrlik yolun hərəkət hissəsinin eni 6-7 metrdən 18 metrə çatdırılır: “Tikinti altına düşən yaşayış və qeyri-yaşayış obyektləri kompensasiya ödənməklə sökülür, küçəyə 3 laydan ibarət yeni asfalt-beton örtüyü döşənir, 2-4 metr enində yeni piyada səkiləri inşa olunur.
Yenidənqurma işləri yekunlaşdıqdan sonra Tbilisi prospekti, istərsə də Hüseyn Cavid parkı tərəfdən hərəkətdə olan avtonəqliyyat vasitələri Hüseyn Cavid prospektinə daxil olmadan Şəfayət Mehdiyev küçəsinin Əbdürrəhim bəy Haqverdiyev və Landau küçələri arasında yerləşən hissəsindən istifadə edə biləcəklər. Bu, Hüseyn Cavid prospektinin metronun “Elmlər Akademiyası” stansiyası qarşısından keçən hissəsində sıxlığın azalmasına səbəb olacaq”.
