Gürcüstan və Azərbaycanda müəllim maaşı
Gürcüstanın dövlətə məxsus orta məktəblərində çalışan müəllimlərin aylıq maaşı oktyabrın 1-dən 150 lari (85 manat) artırılıb. Novator.az bildirir ki, yeniliyə əsasən, baş pedaqoqun maaşı 1011 lari (578 manat), aparıcı müəllimin maaşı 1435 lari (820 manat), yüksək ixtisaslı müəllimin maaşı 1745 lari (997 manat) olur.
Maaş artımı aşağı kateqoriyalı müəllimlərə (stajorlara) aid deyil. Onların maaşı 400 laridir (229 manat).
Azərbaycanın dövlət ümumi təhsil müəssisələrində çalışan, bilik və bacarıqlarının diaqnostik qiymətləndirilməsi aparılan, həftədə 18 saat dərs yükü olan müəllimlərin maaşı bu il sentyabrın 1-dən belə müəyyən edilib:
pedaqoji stajı 3 ilə qədər olan müəllim (ali təhsilli 460 manat, orta ixtisas təhsilli 420 manat);
pedaqoji stajı 3 ildən 8 ilə qədər olan müəllim (ali təhsilli 495 manat, orta ixtisas təhsilli 445 manat);
pedaqoji stajı 8 ildən 13 ilə qədər olan müəllim (ali təhsilli 520 manat, orta ixtisas təhsilli 460 manat);
pedaqoji stajı 13 ildən 18 ilə qədər olan müəllim (ali təhsilli 555 manat, orta ixtisas təhsilli 490 manat);
pedaqoji stajı 18 ildən çox olan müəllim (ali təhsilli 595 manat, orta ixtisas təhsilli 510 manat).
Bilik və bacarıqlarının diaqnostik qiymətləndirilməsi aparılmamış müəllimlərin aylıq vəzifə maaşı göstərilən məbləğlərdən 25 faiz aşağı müəyyən olunub.
