Fədayə Laçının cəzası 3 il azaldıldı
Sentyabrın 30-da Bakı Apellyasiya Məhkəməsi məhbusların qaçmasına kömək göstərməkdə təqsirləndirilən müğənni Fədayə Laçının (Məmmədova) və başqa şəxslərin şikayəti üzrə prosesi başa çatdırıb.
2017-ci il oktyabrın 23-də Astaradan Bakıya etap olunan məhbuslar Etibar Məmmədov və Əli Ağami Biləcəri qəsəbəsi ərazisində xüsusi təyinatlı vaqondan qaçıb. Əli Ağami oktyabrın 26-sı Şirvan şəhərində həbs olunub, Etibar Məmmədov isə noyabrın 2-si Bakının Qaradağ rayonunda keçirilmiş xüsusi əməliyyatda öldürülüb.
Məhkumların qaçmasına yardım etməkdə təqsirləndirilən bəzi şəxslər, o cümlədən Penitensiar Xidmətin bir neçə əməkdaşı, Etibar Məmmədovun dostu Fədayə Laçın tutulub.
2018-ci il dekabrın 26-sı Bakı Ağır Cinayətlər Məhkəməsi başqa iş üzrə də təqsirli bilinən Əli Ağamini 20 il müddətinə azadlıqdan məhrum edib.
Fədayə Laçın 5 il, digər şəxslər 6-9 il arası həbs cəzası alıb.
Bakı Apellyasiya Məhkəməsi sentyabrın 30-da bir neçə məhbusun cəzasını yüngülləşdirib. Fədayə Laçının cəzası 2 ilə endirilib.
