Taleh Bağırovun xanımına rəsmi ittiham verildi
Məhbus ilahiyyatçı Taleh Bağırovun həyat yoldaşı Leyla İsmayılzadə sentyabrın 27-də Ədliyyə Nazirliyinin İstintaq İdarəsində olub. Vəkil Fəxrəddin Mehdiyev Novator.az-a deyib ki, idarədə Leyla İsmayılzadəyə cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların yoxlamadan gizlətməklə və ya hər hansı digər üsulla verilməsi və ya ötürülməsinə cəhd ittihamı elan olunub.
Bu ilin martında Leyla İsmayılzadə övladları ilə birlikdə həyat yoldaşına baş çəkmək üçün Qobustan həbsxanasına gedib. Yoxlama zamanı Leyla İsmayılzadənin üç yaşlı oğlunun çantasından, oyuncaqların arasından köhnə mobil telefon çıxıb.
Taleh Bağırov 2015-ci ilin noyabrında Daxili İşlər Nazirliyinin paytaxtın Nardaran qəsəbəsində keçirdiyi xüsusi əməliyyat zamanı tutulub, dövlətin konstitusiya quruluşunu zorla dəyişdirmək, şəriət qanunları ilə idarə edilən dini dövlət qurmaq məqsədilə silahlanaraq hakimiyyət nümayəndələrinə qarşı terror aktları törətməyi planlaşdırmaqda təqsirli bilinərək Bakı Ağır Cinayətlər Məhkəməsinin hökmü ilə 20 il müddətinə azadlıqdan məhrum edilib.
2017-ci ildə Qobustan həbsxanasında axtarış zamanı Taleh Bağırovun üstündən yaddaş kartları çıxıb, 2018-ci il fevralın 13-də Qaradağ Rayon Məhkəməsi Taleh Bağırovu qadağan olunmuş əşyaların saxlanması, gəzdirilməsi, daşınması və istifadəsində təqsirli bilərək ona beş ay müddətinə azadlıqdan məhrumetmə cəzası kəsib.
