Kitabxanaların məcburi nüsxələrlə təminatı qaydası
Nazirlər Kabineti kitabxanaların çap məhsullarının pulsuz məcburi nüsxələri ilə təchizatı qaydasını təsdiqləyib. Novator.az-ın məlumatına görə, qayda Azərbaycan ərazisindəki nəşriyyatlara, qəzet və jurnal redaksiyalarına, nəşriyyat işi ilə məşğul olan poliqrafiya müəssisələrinə və digər hüquqi şəxslərə şamil olunur. Pulsuz məcburi nüsxələrlə təchizata nəzarəti Mədəniyyət Nazirliyi həyata keçirir.
Qaydada məcburi nüsxələr belə sıralanır: kitab, almanax və kitabçalar; dövri mətbuat materialları, qəzet və jurnallar; avtoreferat, monoqrafiya və dissertasiyalar; not yazıları, albom və statistik materiallar; xəritə, atlas və kartoqrafik materiallar;. afişa, plakat və bukletlər; broşür, bülleten, açıqca və poçt markaları; dərsliklər, dərs vəsaitləri və proqramlar; özündə elmi, ədəbi və informativ məlumatları ehtiva edən digər nəşrlər.
Reklam və təbliğat məqsədilə çap edilən bütün növ nəşr məhsulları məcburi nüsxə hesab olunmur.
Kitabxanaları məcburi nüsxələrlə təmin edən subyektlər bunlardır: dövlət nəşriyyatları; qeyri-dövlət nəşriyyatları; nəşriyyat fəaliyyəti ilə məşğul olan poliqrafiya müəssisələri; qəzet və jurnal redaksiyaları; nəşriyyat fəaliyyəti ilə məşğul olan digər hüquqi şəxslər.
Dövlət və qeyri-dövlət nəşriyyatları, nəşriyyat fəaliyyəti ilə məşğul olan poliqrafiya müəssisələri və digər hüquqi şəxslərin (qəzet və jurnal redaksiyaları istisna olmaqla) buraxdıqları çap məhsullarının 3 pulsuz məcburi nüsxəsi 10 iş günü müddətində Prezident Administrasiyasının və Nazirlər Kabinetinin kitabxanalarına və 2 pulsuz məcburi nüsxəsi Milli Məclisin və profilinə uyğun olaraq Nazirlər Kabinetinin müəyyən etdiyi orqanın (qurumun) kitabxanalarına göndərilməlidir.
Qəzet və jurnal redaksiyalarının buraxdıqları qəzet və jurnalların 2 pulsuz məcburi nüsxəsi tirajın ilk buraxılışı hazırlanan kimi eyni kitabxanalara göndərilməlidir.
Məcburi nüsxələr nəşrin ümumi tirajına daxildir və sifarişçinin hesabına çap olunur.
