Bastainfo.com saytı yeni problemlə üzləşib
Bastainfo.com saytı yeni problemlə üzləşib.
2018-ci il iyulun 3-də Rusiya vətəndaşı Yunis Səfərov Gəncədə icra hakimiyyətinin başçısını odlu silahla öldürməyə cəhd göstərib. Hadisə zamanı başçı və bir polis əməkdaşı yaralanıb. Baş Prokurorluq 2018-ci il iyulun 8-də açıqlama yayaraq qeyd edib ki, bəzi kütləvi informasiya vasitələrinin vəzifəli şəxsləri, həmçinin ayrı-ayrı şəxslər internet informasiya resurslarında Gəncədəki terror aktı ilə əlaqədar həqiqətə uyğun olmayan təxribat xarakterli məlumatlar yayıb. İddiaya əsasən, həmin məlumatlara ictimai rəyi çaşdırmaq, ictimai-siyasi sabitliyi pozmaq, terrorçuluğu dəstəkləyən, vətəndaşlar arasında dövlətin həyata keçirdiyi tədbirlərə inamsızlıq yaratmaq, cinayətkarlığa qarşı mübarizə sahəsində görülən işlərin üzərinə kölgə salmaq məqsədi ilə bilə-bilə yalan məlumatlar, eləcə də yayılması qanunla qadağan edilən informasiyalar daxil edilərək terrorçuluğa və hakimiyyətin zorla ələ keçirilməsinə və Azərbaycan Respublikasının konstitusiya quruluşunun zorla dəyişdirilməsinə yönələn açıq çağırışlar edilib.
Açıqlamada Bastainfo.com saytının da adı hallanıb. Sayt bloklanıb, baş redaktor Mustafa Hacıbəyli Bakı Şəhər Prokurorluğunun bir neçə media orqanına qarşı qaldırdığı cinayət işinə cəlb olunub.
2019-cu il fevralın 21-də Bakı Ağır Cinayətlər Məhkəməsi Mustafa Hacıbəylini Bastainfo.com-da dərc edilən iki məqaləyə görə 5 il 6 ay müddətinə şərti azadlıqdan məhrum edib. Cəzanın 2 ili sınaq müddətidir. Məhkəmə Mustafa Hacıbəylini Cinayət Məcəlləsinin 309-cu (vəzifə səlahiyyətlərini aşma), 313-cü (vəzifə saxtakarlığı) və 281-ci (dövlət əleyhinə çağırışlar) maddələri ilə təqsirli bilib.
Sentyabrın 27-də Novator.az-a danışan Mustafa Hacıbəyli deyib ki, sentyabrın 23-də Bastainfo.com domeni illik ödəniş vaxtı başa çatdıqdan 1 saat sonra başqa müştəriyə satılıb. Baş redaktor bunu hakimiyyətin sifarişi ilə bağlayıb, ABŞ şirkəti ilə danışıqlarda domeni qaytarmağa çalışdıqlarını vurğulayıb.
Saytın Basta2.com adlı başqa domeni də var. Hazırda ora da giriş mümkün deyil. Mustafa Hacıbəyli bu problemin yaxın günlərdə aradan qaldırılacağını deyib.
1972-ci il təvəllüdlü Mustafa Hacıbəyli Qarabağ müharibəsi veteranı, III qrup əlildir. İndiki Dövlət İdarəçilik Akademiyasını bitirib, Şərqi Avropada Demokratiyanın İnkişafı İnstitutunun layihəsi əsasında Polşada jurnalistika sahəsi üzrə ixtisaslaşıb. “525-ci qəzet”də, “Yeni Müsavat” qəzetində çalışıb, “Demokrat” qəzetinin baş redaktoru olub. Bastainfo.com saytını 2015-ci ildə yaradıb.
Mustafa Hacıbəyli Müsavat Partiyası mətbuat xidmətinin rəhbəri, başqan Arif Hacılının qardaşıdır.
