Yeni kreditlər, yeni hesabatlar
İqtisadiyyat Nazirliyinin Sahibkarlığın İnkişafı Fondu sentyabrın 26-sı Ağdam rayonunda işgüzar forum keçirib. Forumda çıxış edən iqtisadiyyat nazirinin müavini Sahib Məmmədov 2019-cu ildə sahibkarlara 116,4 milyon manatadək güzəştli kredit verildiyini, bunun 3800-dən çox yeni iş yerinin açılmasına imkan yaratdığını deyib.
Rəsmi məlumata görə, Yuxarı Qarabağ iqtisadi rayonunda fəaliyyət göstərən 21 sahibkar 26 sentyabr forumunda 1,9 milyon manatdan çox güzəştli kredit alıb. Kreditlərin əsasən heyvandarlıq, pambıqçılıq, bağçılıq, çörək istehsalı və başqa sahələrin inkişafına yönəldiləcəyi vurğulanır.
İndiyədək Yuxarı Qarabağ iqtisadi rayonunda fəaliyyət göstərən sahibkarlıq subyektlərinin 1300-dək investisiya layihəsinin maliyyələşdirilməsinə 44,6 milyon manat güzəştli kredit ayrıldığı bildirilir.
