Naxçıvanın sosial-iqtisadi göstəriciləri
Naxçıvan Muxtar Respublikasının sosial-iqtisadi göstəriciləri açıqlanıb. Novator.az-ın məlumatına görə, bölgənin rəsmi statistika qurumu bildirir ki, 2019-cu ilin yanvar-avqust aylarında muxtar respublikada 1,8 milyard manatlıq ümumi daxili məhsul istehsal olunub, bu da 2018-ci ilin eyni dövrü ilə müqayisədə 1,4 faiz çoxdur. Hər bir nəfərə düşən ümumi daxili məhsulun həcmi 3945 manat göstərilir.
Sənaye istehsalının 2018-ci ilin səkkiz ayına nəzərən 1,2 faiz, sərmayə qoyuluşunun 1,3 faiz, kənd təsərrüfatı istehsalının 3,9 faiz, informasiya və rabitə xidmətlərinin dəyərinin 3,2 faiz artdığı vurğulanır.
Hesabata əsasən, yanvar-avqust aylarında hüquqi və fiziki şəxslərə 77,6 milyon manat məbləğində kreditlər verilib.
Muxtar respublikada 383 növdə məhsul istehsal olunduğu, əhalinin 350 növdə məhsula olan tələbatının tamamilə yerli imkanlar hesabına ödəndiyi qeyd edilir.
Yanvar-avqust aylarında 325,5 milyon ABŞ dolları dəyərində xarici ticarət dövriyyəsi qeydə alınıb. Bunun 285,8 milyon dolları ixracdır.
Rəsmi bilgiyə görə, avqustun 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 454,5 manat təşkil edib.
