Neçənci mükafat?
Argentinalı hücumçu Lionel Messi FİFA-nın sorğusunda ilin ən yaxşı futbolçusu seçilib. 2018-2019 mövsümünü əhatə edən sorğuya milli komandaların baş məşqçiləri, kapitanları və FİFA-ya üzv ölkələrin hərəsindən bir jurnalist qatılıb.
Mükafat sentyabrın 23-ü Milanda təqdim olunub.
Novator.az bildirir ki, Lionel Messi 1987-ci il iyunun 24-də Argentinanın Rosario şəhərində doğulub. 2004-cü ildən İspaniyanın “Barselona” klubunda, 2005-ci ildən Argentina milli komandasında çıxış edir.
10 dəfə İspaniya çempionu, 4 dəfə UEFA Çempionlar Liqasının qalibi olub, 3 dəfə UEFA superkubokunu əldə edib, 3 dəfə klublar arasında dünya çempionluğunu qazanıb.
Olimpiya çempionu (2008), dünya çempionatının gümüş mükafatçısıdır (2014).
Lionel Messi 2009-cu ildə həm “France Football” (Fransa) jurnalının “Qızıl top” mükafatını alıb, həm də FİFA onu dünyanın ən yaxşı futbolçusu seçib. 2010-2015-ci illərdə bu iki mükafat birgə verilib və argentinalı 2010, 2011, 2012, 2015-ci illərdə “FİFA Qızıl top”a sahib çıxıb.
