Büdcə kabinetdən keçdi
Nazirlər Kabineti 2020-ci ilin dövlət və icmal büdcələrinin layihələrinə xeyir-dua verib. Sentyabrın 23-də keçirilən müzakirəyə baş nazir Novruz Məmmədov sədrlik edib. O deyib ki, 2020-ci ildə ümumi daxili məhsulun həcminin 82,7 milyard manatdan çox, real artımın 2,4 faiz, qeyri-neft sektorunda artımın 3,3 faiz səviyyəsində olacağı proqnozlaşdırılır.
Proqnoza görə, 2020-ci ilin dövlət büdcəsinin layihəsində gəlirlər ümumi daxili məhsulun 29,1 faizini, xərclərin 30,9 faizini təşkil edəcək, büdcə kəsiri ümumi daxili məhsulun 1,4 faizi səviyyəsində olacaq.
İcmal büdcənin gəlirlərinin 27,6 milyard, xərclərinin 28,2 milyard manat həddində olacağı gözlənir.
Novator.az bildirir ki, Maliyyə Nazirliyi büdcə sənədlərini sentyabrın 9-da təsdiqləyib. 2020-ci ilin dövlət büdcəsinin layihəsində gəlirlər 24 milyard 484 milyon manat, xərclər 25 milyard 617,7 milyon manat göstərilir, 1 milyard 133,7 milyon manat kəsir proqnozlaşdırılır.
Büdcə gəlirləri hesablanarkən neftin bir barrelinin qiyməti 55 ABŞ dollarından götürülüb.
2019-cu ilin dövlət büdcəsinin gəlirləri 23 milyard 168 milyon manat, xərcləri 25 milyard 190 milyon manat məbləğində təsdiqlənib. Neftin bir barrelinin qiyməti 60 dollar hesablanıb.
2019-cu ilin yanvar-avqust ayları üzrə gəlirlər 14 milyard 810,3 milyon manat, xərclər 14 milyard 712,1 milyon manat göstərilir, büdcənin icrasında 98,2 milyon manat artıqlıq yarandığı vurğulanır.
