Nazir müavininə yubiley təltifi
Xarici işlər nazirinin müavini Xələf Xələfov prezidentin fəxri diplomu ilə təltif edilib. Dövlət başçısı İlham Əliyevin sərəncamında təltif Xələf Xələfovun Azərbaycan Respublikasının ictimai-siyasi həyatında səmərəli fəaliyyəti ilə əsaslandırılıb.
Novator.az bildirir ki, sentyabrın 21-də Xələf Xələfovun 60 yaşı tamam olub.
1959-cu ildə Ermənistanda doğulan Xələf Xələfov Kiyev Dövlət Universitetini və SSRİ Xarici İşlər Nazirliyinin Diplomatik Akademiyasını bitirib.
1983-1990-cu illərdə Azərbaycanın Daxili İşlər Nazirliyində çalışıb.
1991-ci ildən Azərbaycan Xarici İşlər Nazirliyinin Konsulluq İdarəsinin 2-ci katibi, 1992-ci ildən Müqavilə-Hüquq İdarəsinin rəisi, 1997-ci ildən xarici işlər nazirinin müavini olub.
2018-ci ildə Nazirlər Kabineti Aparatının rəhbəri vəzifəsinə təyinat alıb.
2019-cu il mayın 3-də Xələf Xələfov prezident sərəncamı ilə yenidən xarici işlər nazirinin müavini vəzifəsinə gətirilib, başqa bir sərəncamla ona prezidentin sərhəd və Xəzər dənizi məsələləri üzrə xüsusi nümayəndəsi vəzifəsi də həvalə olunub.
