Bakıda 7 il bağlı qalan yol qismən açıldı
Bakının Nəsimi rayonunda Ceyhun Səlimov küçəsinin Əbdülvahab Salamzadə küçəsi ilə kəsişməsindən Cəlil Məmmədquluzadə küçəsinə qədər hissəsində avtomobil nəqliyyatı vasitələrinin hərəkəti bərpa olunub. Xəbəri sentyabrın 23-də Azərbaycan Avtomobil Yolları Dövlət Agentliyi yayıb.
Silahlı Qüvvələrin Baş Klinik Hospitalı istiqamətindəki yol yeni metro stansiyasının tikintisi ilə əlaqədar 7 ildir bağlı idi.
Azərbaycan Avtomobil Yolları Dövlət Agentliyi bildirir ki, Tbilisi prospektində və Ceyhun Səlimov küçəsi ilə kəsişən digər küçələrdə yaşanan sıxlığın aradan qaldırılması üçün qısa müddətlik təmir-tikinti işləri həyata keçirilib. Yeni metro stansiyasının tikintisi tam yekunlaşmadığı üçün 4 hərəkət zolaqlı olan küçənin yalnız bir istiqaməti üzrə 2 hərəkət zolağı bərpa olunaraq sürücülərin istifadəsinə verilib. Yeni stansiyanın tikintisi yekunlaşdıqdan sonra küçənin digər istiqamət üzrə hissəsinin də bərpası işləri həyata keçiriləcək.
